Sitio Dinarawan, San Pablo, Jabonga, Agusan Del Norte, Philippines-Dinarawan Indigenous Peoples Organization (DIPO) Nagmugna ug usa ka Petisyun arun sa Pagbabag ug Pagpaundang sa gipahigayun nga Mineral Exploration sa Mindoro Resources, Limited (MRL) Mining Company sulod sa yutang kabilin sa mga tribung Mamanwa.
Tungod kay, sa gipahigayung konsultasyun sa MRL sa komonidad sa Mamanwa bahin sa pagsulod sa proyekto nga pagmina kaniadtong Hulyo 2008 nga diin hugtanung nagdumili o nagbalibad sa proyektong pagmina.
Tungod kay, kaming mga Mamanwa sa Dinarawan aduna nay CADT application nga giduso sa National Commission on Indigenous Peoples (NCIP) Santiago Service Center ug NCIP provincial office kaniadtong milabayng Octobre 2008.
Tungod kay, kaniadtong Pebrero 25, 2011 among nasayran sa usa ka asembliya nga gimugna sa MRL pinaage kang Barangay Captain Arthur Grana Jr. sa San Pablo nga diin pipila ka mga impliyadu sa MRL inubanan sa mga sakop sa Barangay San Pablo ug San Jose nga diin misaka sa sagradung dapit sa bukid nga ginganlang "ANAHAWAN" arun sa pagpahigayun ug usa ka mineral exploration apan wala kini giage sa gawasnun pagtugot gikan sa katawhang tribung komonidad o Free and Prior Informed Consent (FPIC).
Tungod kay, ang maong kalihukan nakasupak sa IPRA LAW seksiyun 10, 16 ug 59 nga diin adunay katungod nga mapahibalu ang katawhang komonidad sa bisan unsang proyekto ug kalihukan nga bo-ot kining ipahigayun sulod sa yutang kabilin ug ingon man lakip niini ang pagdesisyun sa naasoyng proyekto ug kalihukan.
BUSA, gikauyonan sa tanang membro sa Dinarawan Indigenous Peoples Organization (DIPO) sa usa ka gipahigayung meeting espesyal kaniadtong Pebrero 27, 2011 sa Sitio Dinarawan, Barangay San Pablo Probensiya sa Agusan del Norte ang hugot nga pagbabag sa gipahigayung mineral exploration sa amung yutang kabilin ug hugtanung pagpahunong sa hinanaling panahun.
Gikauyonan nga ipadangat kining maong PETISYUN sa mga ahensiya sa goberno sama sa; National Commission on Indigenous Peoples (NCIP) sa buhatan sa Santiago Service Center, NCIP office Region 13 ngadto sa National Office, Barangay Local Government Unit, Local Government Unit, Mines and Geo sciences Bureau Region 13, Department of Environment and Natural Resources Region 13 ug sa Mindoro Resources, Limited (MRL) Office.
Katawhang tribung Mamanwa sa Sitio, Dinarawan miperma arun sa pagpamatuod ni-ining Bulan sa Pebrero tuig 2011 petsa 27 sa Sitio, Dinarawan tribal community. adunay 103 ka mga indibewal ang miperma sa maong petisyun.
